Avokati Arianit Koci, ka thënë se me rrjedhjen në publik të informatave lidhur me vrasjen e trefishtë në Gllogjan është duke u rrezikuar procedura hetimore e rastit.
Koci, në një reagim publik të dielën, tha se rrjedhja e informatave paraqet joprofesionalizëm nga strukturat e hetuesisë së shtetit.
“Kjo është joprofesionalizëm i pastër nga ana e strukturave të hetuesisë. Dhe kjo, nuk është hera e parë. Po dëmtohen hetimet dhe po shkelet rëndë prezumimi i pafajësisë”, u shpreh Koci.
Kësisoj, ai tha se është i prirur të jetë i rezervuar ndaj informatave që rrjedhin në këtë fazë të hetimeve rreth rastit.
“Prandaj, në këtë rast – çdo informatë – zyrtare apo jozyrtare, jam i prirur ta pranoj me rezerva deri në aktgjykim të plotfuqishëm. Dënues apo lirues”, u shpreh Koci.
Të shtunën mbrëma, Prokuroria e Pejës ka konfirmuar se ka arrestuar tre të dyshuar për vrasjen e trefishtë që ndodhi të premten e fundit të nëntorit në Gllogjan të Deçanit.
Këto informacione i ka bërë të ditura në konferencën e mbajtur në Prishtinë nga kryeprokurori i Pejës, Agim Kurmehaj.
Discussion about this post