Haradinaj: BE-ja ta dorëzojë portfolion te Presidenti Biden, është momenti për marrëveshje finale me njohje reciproke

Kreu i AAK-së, Ramush Hardainaj ka komentuar zhvillimet e djeshme në dialogun Kosovë-Serbi, i cili përfundoi edhe këtë raund pa ndonjë marrëveshje.

Haradinaj ka thënë se SHBA-ja edhe një herë i dha shtytje procesit të dialogut të udhëhequr nga BE dhe ndihmoi e e riktheu normalitetin në raportet Kosovë-Serbi, shkruan Reporteri.net.

Andaj, ish-kryeministri ka thënë se tani është momenti i duhur që BE-ja ta dorëzojë timonin tek presidenti amerikan Biden, në mënyrë që të arrihet marrëveshja finale me njohje reciproke.

“Zbatimi i rendit dhe ligjit në tërë vendin, duhet të ndodh në përputhje me Kushtetutën dhe ligjet e Republikës së Kosovës.

Dialogu i deritashëm nuk guxon të zbehet e të rikthehemi prapë të flasim për të njëjtat tema.

Amerika kësaj here i dha shtytje procesit të udhëhequr nga BE dhe ndihmoi dhe e riktheu normalitetin në raportet Kosovë-Serbi.

Duke i shprehur mirënjohje Bashkimit Evropian për lehtësimin e dialogut, është momenti i duhur që BE ta dorëzojë portfolion te Presidenti Biden, për marrëveshjen finale për njohje reciproke Kosovë – Serbi”, shkruan Haradinaj.