Është mbyllur nën tensione mbledhja e Komisionit Qendror të Zgjedhjeve (KQZ). Kjo pas deklaratave të përfaqësuesit të VV’së në KQZ, Alim Rama. Ai tha se video-mesazhi për t’u bërë thirrje qytetarëve që të marrin pjesë në zgjedhje, nuk duhet të bëhet nga një person që e ka humbur kredibilitetin dhe që e konsideron veten person të urryer, shkruan Gazeta Express.
Kryetarja e KQZ’së, Valdete Daka, ka thënë se do të realizojë videomesazhe për votuesit e 14 shkurtit, ndërsa përfaqësuesit e VV’së në KQZ e kanë pyetur se si mund t’u dalë qytetarëve në video, kur ajo ka deklaruar se është personi më i urryer në Kosovë.
“Ju vetë kryesuese keni deklaruar se jeni personi më i urryer në Kosovë. Nuk po e shoh të arsyeshme që tash video-ftesa të bëhet nga një person që e ka humbur kredibilitetin. Unë kisha kërkuar që KQZ’ja si e tërë të bëj thirrje votuesve për zgjedhje”, ka thënë Rama.
Pas kësaj deklarate të përfaqësuesit të VV’së reagoi edhe Daka.
“A e keni pyetur ndonjëherë veten se pse kam deklaruar ashtu”, ka thënë Daka.
Në ndërkohë Rama, tha se ajo vetë e ka pranuar një gjë të tillë , përgjigje pas së cilës, Daka bashkë me anëtarët e tjerë e lëshuan sallën dhe braktisën mbledhjen e KQZ’së.
“Po sepse ju vetë votuat që mos t’ia lejoni qytetarëve që të votojnë të shtunën apo ti dërgojnë votat të shtunën”, ka thënë Rama.
Ndërsa pas lirimit të mbledhjes, i menjëhershëm ishte edhe reagimi i Sami Kurteshit, i cili këtë veprim të Dakës dhe të tjerëve e ka cilësuar mënyrë qyqare.
“Kjo është mënyrë qyqare e mbylljes së një mbledhje. Është një pyetje që u bë. Nëse e bën një pyetje atëherë duhet ta dëgjosh përgjigjen. Ti vet ke deklaruar që je personi më i urryer”, ka thënë Kurteshi. /Gazeta Express.
Discussion about this post