Policia e Kosovës, si institucioni parësor që kujdeset për sigurinë e qytetarëve të vendit, mund të themi se ka kapacitete të mjaftueshme logjistike për realizimin e detyrave dhe autorizimeve policore, siç edhe parashihen. Një mjet mjaft i rëndësishëm që lehtëson punën e tyre pa dyshim që janë automjetet rrugore…
Policia e Kosovës vlerësohet se qëndron bukur mirë në këtë aspekt në rajon.
Në një përgjigje për Periskopin, Policia ka konfirmuar se aktualisht posedojnë mbi 1 mijë automjete të llojeve dhe prodhuesve të ndryshëm, përfshirë Wolksvagen, Toyota, Mercedes etj,
‘’Policia e Kosovës si organizatë e madhe, në kuadër të sajë ka mbi një mijë automjete nga prodhues të ndryshëm, të cilat i shfrytëzon për realizim të detyrave dhe përgjegjësive të saja ligjore në interes të qytetarëve dhe vendit’’, thuhet në përgjigjen e Policisë.
Tutje Policia vlerëson se ‘’ka kapacitete të mjaftueshme logjistike për realizimin e detyrave dhe autorizimeve policore. të cilat Policia e Kosovës vazhdon t’i realizojë sipas nevojës dhe planifikimeve policore’’.
Në janar, Policia e Kosovës kishte paraparë që mbi 500 mijë euro t’i ndajë për sigurimin e automjeteve. Kështu kishte bërë të ditur Komisioni Rregullativ i Prokurimit Publik (KRPP).
Mirëpo, kur jemi tek kapacitetet logjistike, Policia nuk qëndron mirë me posedimin e numrit të radarëve. Para disa muajsh, ministri i Punëve të Brendshme, Xhelal Sveçla kishte deklaruar se si shtet posedojmë veç shtatë radarë për matjen e shpejtësisë në komunikacion. Kjo gjë ishte cilësuar skandaloze, duke qenë se janë një mjet që mund të parandalojë aksidentet e trafikut përmes kontrolleve rrugore.
‘’Policia e Kosovës për momentin i ka shtatë radarë. Në këtë gjendje jemi”, kishte thënë Sveçla në maj të këtij viti./PERISKOPI/
Discussion about this post