Kryetari i LDK-së, Lumir Abdixhiku, ka kritikuar Qeverinë Kurti për mungesën e realizimit të investimeve kapitale në Kosovë është më i ulëti në gjithë dekadën e fundit.
“Po kalon viti i dytë qeverisës, vera e dytë e kohës së punimeve dhe asnjë projekt kapital nuk po merr formë në vendin tonë. As edhe një shenjë e lënë”, ka thënë Abdixhiku.
Kreu i LDK-së i ka drejtuar edhe disa pyetje për punën e Kurtit.
“Kur keni parë kryeministrin e Kosovës të fillojë, përurojë apo edhe të flasë për ndonjë projekt madhor kudo në Kosovë? Cilën vendpunishte me punëtorë e ka nisur ai apo kjo Qeveri deri më sot? Premtimet e 40 çerdheve në Kosovë, të 4000 banesave sociale, të rrugëve rajonale, bankave zhvillimore e aseteve sovrane – nuk kanë filluar as edhe në letër. Dhe për aq sa merr kohë një projekt të nisë e përfundojë, edhe dy verat e ardhshme të këtij mandati do të shkojnë pa asnjë shenjë të lënë”.
Abdixhiku tha se Kosova ka nevojë për zhvillim, derisa shton se zhvillimi nuk mund të reduktohet në disa transakcione bankare të skemave sociale.
“S’është ekonomia kaq e thjeshtë e shteti s’është vetëm bankë. Kosova megjithatë ka nevojë për projekte të guximshme dhe të mëdha; për investime kapitale në spitale, shkolla, infrastrukturë rrugore, stadiume, salla kulturore e në energji – në pothuajse çdo fushë të jetës publike”.
Abdixhiku e kritikoi Kurtin edhe për arrogancë dhe arsyetime.
“Fukarallëku mendor i kësaj Qeverie po prodhon tkurrje kolektive të gjithë shoqërisë sonë. Kosova sot duket e trishtë krahasuar me tempon e punimeve në secilin shtet në rajon. E në mungesë të projekteve kapitale, le të mjaftohemi me foto shëtitëse, arrogancë qeverisjeje e arsyetime të 20 viteve të shkuara. Është më e lehtë kjo”.
Këto janë të dhënat për shpenzimin e buxhetit për investimet kapitale, të publikuara nga instituti GAP.
Discussion about this post