Dje është publikuar nëpër media një plan 9 pikësh për bisedimet Ksoovë-Serbi.Për anëtaren e LDK-së, Melihate Tërmkolli, ky plan është i Serbisë kundër Kosovës për ta realiauzar “Serbinë e Madhe”.Tërmkolli thotë se ky plan do sjellë “Republikën Srbska” në Kosovë, me kompetenca shtetërore.
Krahasuar me këtë, ajo thotë se korrigjimi i kufijve nuk do të ishte asgjë.Ajo shton se nuk është koha e ‘pallavrave’ por të sigurohet njohje nga ana e Serbisë sa më shpejtë:Shkrimi i saj i plotë:
Plani i BE-së për bisedimet, “Republika Srbska, plus” dhe politika e lodhët e Kosovës!Nëse është i vërtetë plani prej nëntë pikash i publikuar dje në shumë medie, si plan i BE-së përmes Lajçak-ut për bisedimet Kosovë- Serbi, kjo mund të quhet thjesht një plan i Serbisë kundër Kosovës si pjesë e realizimit të mëtejmë të politikave të përcaktuara në programet e elaboratet serbe kundër shqiptarëve e për “Serbinë e Madhe”.
Ky plan do të sillte “Republika Srbska-n” në Kosovë, autonomi me kompetenca të plota shtetërore për jo më shumë se 5% të qytetarëve serbë të Kosovës. Thënë më shkurt do të sillte ndarjen e brendshme të Kosovës në vija territoriale etnike dhe përtej saj, si një trampolinë për ndarje edhe fomale-juridike të pjesës veriore dhe vazhdimin e autonomisë për pjesët tjera të Kosovës të banuara me serbë.Do të sillte procesin e rikolonizimit të Kosovës, i cili edhe sot po realizohet me të madhe në pjesën veriore të Kosovës, derisa ky plan kthehet në vitin 1976 për rikolonizim aty ku e lanë hartuesit dhe zbatuesit e planeve gjenocidale kundër shqiptarëve e Kosovës. Përfshirë në këtë plan edhe Kishat ortodokse me tokat e pasurinë e Rrafshit të Dukagjinit. Pra, nëse është i vërtetë, ky është një plan i BE-së për ripushtimin e Kosovës nga Serbia. Prandaj Lajçak-u në takimin e parë të rifillimit të bisedimeve në Bruksel ishte ulur në anë dhe në krah të Vuçiqit!
Ky plan, qoftë i vërtetë apo jo, shpërfaqë pozicionin e BE-së ndaj Kosovës dhe shqiptarëve, për të rikthyer Serbinë e sundimin serb në Kosovë. Si i tillë, prandaj, ky plan nuk ka të bëjë asgjë me “normalizimin” e marrëdhënieve Kosovë-Serbi, aq më pak me njohjen e Kosovës nga Serbia”
Nga kjo pikëpamje, “korrigjimi i kufijve” do të mbetej “lule në saksi”!
Natyrisht, një plan i tillë veç do të duhej refuzuar automatikisht pa guxuar kush ta vë në tavolinë të bisedimeve.
Ku është politika e Kosovës në këtë mes?!
Kështu si kanë filluar bisedimet, pa një agjendë të qartë, me deklarata konfuze të Kryeministrit Hoti, me pranimin e bisedimeve “teknike” dhe pa as më të voglën përpjekje për një konsensus politik nacional, vendi mund të hyjë në rreziqe dhe situata me dëme të parikuperueshme. Kryeministri veç po deklaron për një marrëveshje që do të sillte njohjen por praktikisht po vepron të kundërtën.
Kryeministri poashtu deklaroi se nuk ka “Mini shengen”, por në realitet ajo çfarë shpjegoi si nevojë për bashkëpunim rajonal është veç “Mini shengen”, një reinkarnim i planeve serbe me moton “Ballkani ballkanasve”.
Kryeministri dhe të tjerë me gjasë nuk e kanë të qartë se është kohë e finalizimit të një marrëveshje për njohje të Kosovës nga ana e Serbisë e jo për pallavra të llojit të bisedimeve për çështje të veçanta për ‘normalizim” të raporteve Kosovë-Serbi. Kjo qasje e bisedimeve tani është veç në shërbim dhe në interes të Serbisë për ecjen e saj drejt anëtarësimit në BE ashtu siç ndodhi edhe me bisedimet “teknike” nga viti 2011. Nga ato bisedime, Kosova veç ka humbur, nuk ka fituar asgjë. Madje as liberalizimin e vizave.
SHBA-të janë jashtë procesit të këtyre bisedimeve e Kryeministri dhe të tjerët “nuk e dinë” se nuk mund të ketë marrëveshje me Serbinë pa koordinim BE-SHBA, madje pa rolin prijës të SHBA-ve, njësoj si në të gjitha proceset deri tani.
Kjo çfarë po ndodhë në politikën e Kosovës, nuk mund të quhet politikë, aq më pak politikë nacionale.
Në veçanti, këto 2-3 vitet e fundit, Kosova është dobësuar dhe po dobësohet edhe më shumë, si në planin e brendshëm ashtu edhe në bisedimet me Serbinë.
As Serbia, as Lajçaku dhe askush tjetër nuk na presin derisa të zgjohemi ne që të punojmë për vendin tonë, për qytetarët tanë.
Discussion about this post