Koronavirusi gjatë tre muajve të kaluar ka lënë pasoja ekonomike si kudo në botë ashtu edhe në Kosovë.Për ta zbutur pak këtë situatë, Qeveria e Kosovës, gjegjësisht Ministria e Financave ka ndërmarrë një iniciativë për t`iu dalë në ndihmë qytetarëve dhe bizneseve.Iniciativa ka të bëjë me mundësinë e tërheqjes së 10 për qind të kursimeve pensionale nga Trusti.
Nëse kjo arrin të gjejë zbatim, Trusti nuk rrezikohet financiarisht.Kështu deklaroi në një përgjigje për Klankosova.tv, Jeton Demi, menaxher i Zyrës për Media në Trustin e Kursimeve Pensionale.“Efekti negativ i pandemisë në investimet e Trustit është kompensuar gati plotësisht dhe nuk mund të flitet për ndonjë rrezikim financiar. Sa i përket vendimeve të Qeverisë apo Kuvendit, ne nuk i komentojmë ato. Ngelet të shihet si do të jetë vendimi përfundimtar, meqë ideja është ende është në nivel të diskutimit”.
Ndërkaq, eksperti i ekonomisë Safet Gërxhaliu, e sheh si shumë pozitiv këtë hap të ekzekutivit.“Në rend të parë Kosova është përballë nga pandemia Covid-19, e cila është reflektuar edhe në ekonomi. Trusti është institucion që zgjidhet dhe menaxhohet nga Kuvendi. Kosova është në një situatë të rëndë, pa rishikim të buxhetit. Duhet të gjenden alternativa pasi që të hyrat nga Administrata Tatimore e Kosovës dhe Dogana kanë shënuar rënie”.Gërxhaliu tha se një mundësi e tillë do të krijonte rritje të konsumit.“Si shembull të përkrahjes duhet të merren vendet e rajonit. Është nisur një pako emergjente.
Akoma kanë mbetur pa paguar të gjitha pagesat prej 170 eurosh. Ka pasur premtime për pagesën e qerave për bizneset”.“Tentimi është rritja e konsumit. Nga rritja e konsumit mund të ketë rritje të tregtisë, rritja e tregtisë dhe gastronomisë, do të thotë edhe punësim”.Ish-kreu i Odës Ekonomike të Kosovës shtoi se 10 përqindëshi i tërheqjes së kursimeve nga Trusti është afatshkurtër.“10 përqindëshi nuk mjafton, ajo është afatshkurtër. Duhet të gjendet mundësia dhe nuk duhet të anashkalohet huamarrja nga partnerët ndërkombëtar, gjithmonë duke mos hyrë në obligime të mëdha financiare, dhe duke respektuar ligjin”.
Discussion about this post